Bujang Senang

Bujang Senang

8 Jun 2016

#DUNSARAWAK:Semua 82 ADUN Sarawak bela udah ngangkat sumpah kemari


Semua 82 iku Kaban Kunsil Nengeri (ADUN) Sarawak udah mujur ngangkat sumpah bejalaika tanggungpengawa diri lalu pengawa tu kemari dipunka Kepala Menteri ti mega ADUN Tanjung Datu Datuk Patinggi Tan Sri Adenan Satem, kemari.
Nangkanka Adenan, tiga iku Sapit Kepala Menteri ti mega nyadi ADUN Bukit Saban Datuk Amar Douglas Uggah Embas, ADUN Baleh Tan Sri Datuk Amar Dr. James Jemut Masing enggau ADUN Satok Datuk Amar Abang Johari Tun Openg.
Semua 82 ADUN tu nyengkaum 72 iku pengari rayat ari Barisan Nasional (BN) enggau 10 iku ari parti penyakal ti nyerangkung tujuh iku ari Parti Tindakan Demokratik (DAP) enggau tiga ari Parti Keadilan Rakyat (PKR), bela ngangkat sumpah dimua Speaker Kunsil Nengeri (DUN) Datuk Amar Mohamad Awang Asfia Awang Nassar.
Atur pengawa angkat sumpah bejalaika pengawa nyadi ADUN nya diatur sebedau Penggal Keterubah Aum DUN Ke-18 ke diatur 7 ngagai 15 Jun tu, ba Begunan DUN ditu.
Aum DUN Ke-18 deka dipenyadika Tuai Pemegai Menua (TYT) Tun Pehin Sri Abdul Taib Mahmud ba mua Begunan DUN, nengah pengawa baris beradat seharitu.
Serak tu, bisi 29 iku ADUN ti keterubah iya nyereta aum DUN.
Maya baum DUN Ke-18 bisi sebengkah Rang Undang-undang deka dibantaika iya nya Rang Undang-Undang Bekalan Tambahan (Rang Undang-Undang 2015/2016), ti deka dibacha Menteri Wang Kedua Dato Sri Wong Soon Koh kena 9 Jun lalu deka ditandu bacha kena 13 Jun.
Ba aum DUN Ke-18, naka 20 Mei apin lama bisi 336 iti tanya ari 44 iku ADUN, lalu ari penyampau nya bisi 269 deka disaut terus maya baum sereta 65 disaut nengah chara betulis.
Borneo post

0 komentar: