Bujang Senang

Bujang Senang

29 Jun 2016

PBB Mulu nerima Datuk Gerawat ke dalam parti


Semua kaban asal Parti Pesaka Bumiputera Bersatu (PBB) Pampang Mit Mulu udah ngenuku sereta nerima resolusyen nyukung kaban kunsil nengeri (ADUN) ke baru dipilih ke mega ex-kaban parti, Datuk Gerawat Gala, patut diterima dalam parti nya.
Resolusyen tu udah dikemendarka bala protem PBB pampang Mulu rambau aum komiti ke diatur bedau lama ti udah di Miri.
Jaku penerang ngenukuka sukung udah disain chairman protem pampang, Robert Laing Anyie, Ketuai Raban Nembiak, Usat Bilong enggau Sapit Ketuai Indu, Catherine Awing Wan.
Aum pengelama empat jam udah dichairmanka Robert Laing ke nyadi Chairman Komiti Protem.
Dalam jaku penerang senentang resolusyen nya,  kaban pampang madahka pekara nya bepun ari inisiatif PBB Mulu ngira Gerawat nyadi chalun terus Barisan Nasional (BN) meretika pekara iya ulih nyereta baru parti nya.
Pengudah iya ningkilka diri ari PBB lalu bediri minta pilih nyadi chalun terus BN ba penuduk baru Mulu ke mega dipinta Parti Demokratik Progresif Sarawak (SPDP) nitihka peturun ari SNAP sereta kenang/sejarah serakup nya.
Datuk Gerawat Gala, menang enggau majoriti undi 1,708 rambau Pengawa Bepilih Nengeri (PRN) 7 Mei tu tadi. Iya nerima 3,198 iti undi, Pauls Baya (1,490 iti undi), lalu Paul Anyie Raja, chalun ari Parti Tindakan Demokratik (DAP) teulihka 309 iti undi sereta chalun Ngatika Diri, Dr Roland Dom Mattu bulih 239 iti undi.
Kepala Menteri Datuk Patinggi Adenan Satem, mega nyadi Chairman BN Sarawak sereta Presiden PBB, udah ngenukuka kesemua chalun terus BN ti dipilih ke udah menang, patut ngumbuk bala kaban ba renggat pun menua dalam parti ke dipilih sida.
Parti komponen BN bukai mantah lebuh kesemua chalun terus BN Bumiputera minta diri nyereta PBB, madahka Adenan udah nyamin enda ulih lebih ari 40 iku chalun rambau PRN tu tadi.
Enam iku ke bukai pengari BN dipilih nadia parti ke dulu agi bisi minta nyereta PBB iya nya Tan Sri William Mawan Ikom (Pakan), Dato Gerawat Gala (Mulu), Rosey Yunus (Bekenu), Paulus Palu Gumbang (Batu Danau), Miro Simuh (Serembu) enggau John Ilus (Bukit Semuja).
Mawan, Rosey enggau Paulus ke nyadi ex-kaban Parti Tenaga Rakyat Sarawak (Teras) lalu Gerawat, Miro enggau Ilus nyadi ex-kaban PBB. Semua sida tu ningkilka diri ari parti laban bediri minta pilih nyadi chalun terus BN, sereta menang.
Datuk Dr Jerip Susil, Ranum Mina enggau Dr Johnical Rayong, ex-kaban Parti Bersatu Rakyat (UPP) mega bisi nganjung peminta.
Nyema PBB nerima kesemua semilan peminta nya, penyampau tubuh kaban kunsil nengeri dalam 82 penuduk ba Aum Kunsil Nengeri (DUN) deka manggai 49 iku, sereta penyampau Kaban Parlimen (MP) mega deka nambah seiku, nyadi 16 iku laban Mawan mega nyadi MP Saratok.
Rambau PRN 7 Mei tu tadi, PBB diagihka 40 penuduk lalu menang kesemua penuduk nya, PRS diberi 11 penuduk mega menang semua, Parti Sa’ati Rayat Sarawak (SUPP) diberi 13 penuduk lalu menang tujuh, SPDP menggi lima tang semina menang tiga penuduk, lalu 10 iku ari 13 iku chalun terus BN, menang.
PBB Mulu dalam resolusyen iya madahka sida nejuka pekara nya ba jari Adenan dalam aum sida begulai enggau iya di Mulu alai sida deka nyukung chalun ti dipilih iya.
“Rambau kimpin pengawa bepilih, kesemua kaban PBB begulai enggau Gerawat laban semina iya seiku aja chalun BN. Kaban ari parti komponen BN ke bukai di Mulu ngakun Dato Gerawat nyadi chalun penyanding PBB,” ku penerang nya.
PBB Mulu mantaika diri optimis enggau penama iya pengudah pengawa bepilih ngagai PBB, semangat bekereja ke manah sereta kerejasama entara parti komponen BN; PBB, PRS enggau SPDP deka terus dikemeran ba dalam konstituensi tu.
Taja pia, iya enda madahka ngenggaika nyema Gerawat nyereta parti komponen ke bukai.
Borneo post

0 komentar: